Жаңалықтарды Telegram арнамыздан оқыңыз!Халықаралық сыбайлас жемқорлықпен күрес күніне орай Ақтөбеде де ерекше шара өтті. Оқушылар салған тақырыптық суреттер шаһар көшелеріндегі лэд экрандар мен баннерлерге қойылды. Мұндай тәжірибе елімізде бұған дейін болмаған. Ұйымдастырушылар басқа өңірдегі әріптестерін де осылай жасауға үндеді. Бұл суреттердің барлығы жемқорлық тақырыбына арналған. Алдын ала байқау жарияланып, жүзге жуық оқушының туындысы жинақталды.
Шара барысында ақпарат құралдары мен жас қаламгерлер арасында ұйымдастырылған шығармашылық байқаудың жеңімпаздары да арнайы марапаттарға ие болды. Облыстық департамент мамандары осы шара арқылы жастарды шыншылдыққа, әділдікке тәрбиелеуге болатынына сенімді.
Алмат Мырзалиев, Ақтөбе облыстық жемқорлыққа қарсы іс-қимыл департаменті басшысының орынбасары:
Ұтқан балалардың суретін осы ЛЕД-экрандарға және баннерларға қойдық. Бұл сыбайлас жемқорлыққа қарсы, былай айтқанда, мәдениетті күшейту үшін жасалып жатқан жайт. Кішкентай балалардың да қазірден бастап ойларына қондыру. Бұл практиканы басқа региондарға да енгізу жоспарда бар.
Жақсыбек Кемал
