Жаңалықтарды Telegram арнамыздан оқыңыз!Ақмола облысының Бұланды ауданында бір тәулік бойы толастамай жауған жауын мөлшері орташа айлық нормадан 169 пайызға асып түсті. Оған еріген қар суы қосылып, аудан орталығы Макинск қаласы мен Қараөзек, Иванковка ауылдарын су басты.
Макинскіде ернеуінен асты дейтіндей өзен-көл жоқ. Дегенмен, көктем басталғалы бірнеше көшелердегі үйлерді осымен екінші рет су басып жатыр. Даладан келген қар суы халықты әбден әбігерге салды. Судың қарқынын азайту мақсатында облыстық маңыздағы жолды ашып жіберген. Судың деңгейі сәл төмендегенімен, үйлерге кірген су әлі азаймай тұр.
Даладан ағылған су шаһар көшелерін басып, аулалар мен үйге кірді. Қаланың шеткі үйлерін басқан су тіпті, тізеден келген. Су сору жұмыстары да көмектеспей тұр. Себебі, даладан ағылған судың қарқыны күшті болған.
Тамара Шакшина, Макинск қаласының тұрғыны:
Су үйге кірген соң су сорғышты қостым, көмектеспеді. Қаладағы арнайы штабқа хабарластым. Олар кезекпен келіп, көмек көрсетілетінін айтты.
Су тасқыны жалғыз Макинск қаласына емес, көрші Иванковка мен Қараөзек ауылдарына да қауіп төндірді. Жолдарын су шайып, халық қатынассыз қалған. Апаттың салдарын жоюға Көкшетау, Атбасар және Астана қалаларынан келген құтқарушылар тартылып, су сору жұмыстарын атқаруда.
Марат Ахметжанов, облыс әкімі:
Жалпы енді ауданға келетін болсақ иванковка ауылға да су кірді. Ол көпірге мұз тірлеліп, су бағыты бұрылып, су арнасында тұрған көше ағасымен өтті. Біраз үйлер көшірілген былтыр. Ауылда алыс үй бар. 41 жаңадан салынған. Тағы 10 үй бар. Жағдайын қарап көпір мәселесін қазір жақын арада қатынас жасайтындай жағдай жасаймыз.
Бүгінде ауданда облыстық жедел штаб құрылып, жұмыс істеуде. Су кірген үйлер есепке алынып, халық қолдаусыз қалмайды,- дейді жергілікті билік өкілдері.
Бибінұр Әмірханқызы
