Жаңалықтарды Telegram арнамыздан оқыңыз!Ақтауда бірнеше сағаттан кейін «Ақтау – Түркі әлемінің мәдени астанасы» жылының ашылу салтанаты өтеді. Халықаралық шара сағат 19-30 да Ұлттық арнада тікелей эфирде көрсетіледі. Еліміздің мәдениет және ақпарат министрлігінің қолдауымен ұйымдастырылған ауқымды шара әлемдік деңгейдегі өнер жұлдыздарының қатысуымен ғаламат шоуға ұласады деп күтілуде. Аягөз Оралбайқызы тарқатып айтады.
Кешеден бері түркі әлемінің назары Ақтауда. Шаһарда бұрын соңды болмаған мәдени шара өтіп жатыр. Теңіз жағалауында бір емес екі сахна тігіліп, 7 ауылдан тұратын этноқалашық бой көтерді. Мәдени-спорттық шаралар таңғы сағат 10-нан бастап кешкі 21.00-ге дейін жалғасуда. Көпшілік ұлттық киіммен жүр. Асық ату, бестас секілді ұлттық ойындар ойнап, сынға түсуде. Шетелдік туристер келін түсіру, құда күту секілді салт-дәстүрімізге тәнті болды.
Шахлат Мацыфаева, Хорезм қаласының тұрғыны (Өзбекстан):
Қазақтың беташар, келін түсіру дәстүрін тамашалап, театр қойылымын көргендей әсер алдым. Ақтауға түркі тілдес елдерден келген қолөнершілер арасынан отандастарымды көріп, мәз-мейрам болдық. Каспийдің жағасында осындай ұлан-ғасыр мәдени шара өткізген қазақ ағайынға мың алғыс.
Қазақтың, қала берді түркі әлемінің бай мәдениетін дәріптейтін ауқымды бағдарлама 3 күнге жоспарланған. Ертең де «Дархан дала» этноқалашығындағы «Суын айғыр», «Шерқала», «Дәстүр» «Батырлар», «Ғашықтар» секілді 7 ауылда өнерпаздар қойылым көрсетіп, қолөнершілер шеберлік сағаттарын өткізеді.
Қошқарбай Мәтіков, Қарақия ауданының тұрғыны:
Маңғыстауда 14 наурыздан ұлы той басталады ғой, өздеріңіз білесіздер. Сол той әлі жалғасын тауып жатыр. Кереметі кеше 22-сі күні біздің ұлттық киімімізбен 5 мыңның үстінде адам шығып Гиннестің кітабына кіріп, рекорд жасадық. Ол да бір үлкен мақтаныш. Оның үстіне Ақтау қаламыз түркі әлемінің мәдени астанасы болып жатыр. Соны міне елге танытатын ұлы той.
Салтанатты шараның ашылуына небәрі 2 сағаттай уақыт қалды. Қазірдің өзінде жағалауда адам көп. Ауқымды шараны тамашалауға 30 мыңдай адам жиналады деген болжам бар. Салтанатты шараның соңы қазақтың әлемге танымал өнер жұлдызы Димаш Құдайберген бастаған, ТҮРКСОЙ ұйымы әртістерінің гала концертіне ұласпақ.
Аягөз Оралбайқызы
