![Президент бірнеше шетелдік компания басшыларын қабылдады](https://cdn.qazaqstan.tv/old/articles/8/article_85976.jpg?w=928&h=522&format=jpg&resize=aspectfill&g=center)
Шетелдік инвесторлар кеңесінің бұл 28-ші отырысы. Жылына кемінде бір рет өтеді. Ел үшін, экономика үшін аса маңызды болғандықтан, бұл кеңеске міндетті түрде Мемлекет басшысы өзі қатысады. Ақылдасады. Инвесторлар талап-тілегін көзбе көз отырып тыңдайды.
Президент осы форум шеңберінде бірнеше инвесторды Ақордада қабылдады. Алғашқысы - Джеймс Коулз. «Citigroup» компаниясының бас атқарушы директоры.
Кездесуде Қазақстанның бұдан әрі қарай дамуының бес институционалдық реформаны қамтитын негізгі жоспарлары талқыланды. Тағы бір инвестор - Тим Гитцель. «Cameco» компаниясының бас басқарушы директоры. Тараптар Қазақстандағы уран өндіру саласының келешегі туралы сұхбаттасты.
Тим Гитцель өз кезегінде «Cameco» және «ҚазАтомӨнеркәсіп» компаниялары арасындағы ынтымақты нығайтудың маңыздылығына тоқталған. Сондай-ақ, Елбасы «Glencore International» компаниясының бас атқарушы директоры Айван Глазенбергті де қабылдады.
Нұрсұлтан Назарбаев компанияның Жәйрем тау-кен байыту комбинатын меншігіне алуының маңыздылығын, оның айтарлықтай әлеуетке ие екенін айтты. Өйткені, Жәйрем кенішін одан әрі дамыту компанияның шикізаттық базасын кеңейтуге мүмкіндік береді әрі қорғасын-мырыш саласының ұзақмерзімді тиімділігін арттыруға ықпал етеді.
Ақордада болған тағы бір инвестор - Брайан Хамилтон. Daqri компаниясының вице-президенті. Ол компанияның Қазақстанның инновациялық дамуын қолдайтынын, осы мақсатта мамандарға өз тәжірибесін үйрететінін айтты. Daqri компаниясы «EXPO-2017» шарасына қатысуға дайын.
Мейіржан ӘЛІБЕКҰЛЫ
![](https://px.mediadata.kz/s.gif?mh_id=7916e9245b3c5232be2c21bfdafded87&mh_news=Президент бірнеше шетелдік компания басшыларын қабылдады&mh_tags=Qazaqstan&mh_page=https://qazaqstan.tv./index.php/news/74761/)