Жаңалықтарды Telegram арнамыздан оқыңыз!Жапонияның Осака университетінде білім алған қызылордалық жас жігіт Абзал Іскендір туған ауылындағы мектепте мұғалім боп қызмет етіп жүр. Әлемнің іргелі оқу орнында оқып, магистр дәрежесін алған «Болашақтың» түлегі ауыл баласына тәлім-тәрбие беруді жөн деп тапқан. Президент бағдарламасы арқылы талай жас биіктерді бағындырды. «Енді осындай мүмкіндікке ауыл балаларының да қолы жетсе», - дейді ұстаз. Сондықтан, Абзал Іскендір ауылды тастап ешқайда кетпейтінін айтады.
Қазалы ауданы Әйтеке би кентіндегі №234 мектептің физика пәнінің мұғалімі Абзал Іскендірдің әр сабағы өзінше ерек. Жас ұстаз шет елде алған білімін тәжірибемен ұштастыра отырып, ауыл балаларының ой-өресін кеңейтуді мақсат етеді. «Баланың барлығы бірдей, мейлі, ол қалада болсын, мейлі, ол ауылда болсын. Тек әр оқушының бойындағы ұшқынды көре білу керек», - дейді ол.
Абзал Іскендір, мұғалім:
- Білім - шексіз. Ұрпақ тәрбиесіне күш саламын. Балалардың білім алуына, ұлтжанды азамат болып қалыптасуына септігім тиіп жатса, сол менің еңбегімнің қайтқаны.
Абзал 28 жасында «Болашақ» стипендиясының иегері атанды. Әрине, оған оңай қол жеткізген жоқ. Еңбектенді, тіл үйренді, ең бастысы, алдына айқын мақсат қойды.
Абзал Іскендір, мұғалім:
- Англияның екі қаласында оқыдым. Оқу уақыты 1,5 жылдай болды. Онан кейін таңдағаным Жапон елі. Жапонияның Осака университетінде физика факультетінің «Ядролық және физика» кафедрасында оқыдым.
Осындай әлемнің айтулы оқу орындарында білім жетілдіріп, туған жерді түлетуге талпынған жас ауыл мектебіне тың серпін ала келді. Оның озық тәжірибесі мен жаңашылдығы өзге педагогтарға өнеге болса, оқушылар тіпті ерекше әсерде.
Назгүл Жанай, оқушы:
- Әр сабағына тыңғылықты дайындықпен келеді. Сондықтан, сабақтары көңілді әрі түсінікті өтеді. Біз қуаныштымыз.
Жаңартылған білім беру жүйесі бойынша ағылшын тілін меңгерген ұстаздардың жалақысы артты. Ал, Абзал ағылшын тілін ғана емес, жапон тілін де жетік меңгерген.
Ақерке БЕРІКБЕКҚЫЗЫ
«YouTube»-тағы «Qazaqstan TV» арнасына жазылып, AppStore және Google Play сервистерінен «Qazaqstan TV» мобильді қосымшасын тегін жүктеп алыңыз.
