Жаңалықтарды Telegram арнамыздан оқыңыз!«Астана Опера» театры қала тұрғындары мен қонақтарының назарына аспапты және вокалды ескі музыка ұсынады. 10 ақпанда, сағат 19:00-де театрдың Камералық залында «Орфейдің оралуы» атты концерті өтеді.
Кеш бағдарламасына Г.Ф.Гендельдің скрипка мен фортепианоға арналған №2 сонатасы, И.С.Бахтың «Чаконасы» мен «Ариозосы», Л.Боккеринидің виолончельге арналған сонатасы, П.Локателлидің сонатасы, Б.Марчеллоның флейта мен гитараға арналған сонатасы сияқты ескі камералық шығармалар кіреді.
Ал, оларды музыкант-аспапшылар - ҚР Еңбек сіңірген әртісі Мақпал Бекмағамбетова (скрипка), халықаралық конкурстардың лауреаттары - Асқар Мұқанов (виолончель), Жібек Сапарғалиева (флейта), Жәнібек Сапаров (гитара) ұсынады.
Роза Нүркей, Елена Низамутдинова, Елена Ганжа (сопрано), Салтанат Мұратбекова, Татьяна Вицинская (меццо-сопрано) және Нарұл Төйкеновтердің (тенор) орындауында И.С.Бах, Г.Ф.Гендель, Д.Скарлатти және басқалардың ариялары шырқалады.
Салтанат Мұратбекова К.В. Глюктің «Орфей және Эвридика» операсынан Орфейдің екі ариясын ұсынады. Сирек кездесетін колоратуралық меццо-сопрано дауысының иегері классикалық және барокколық опералық шығармалардың басты партияларын Италияның үздік сахналарында орындаған.
Фортепиано партиясын халықаралық конкурстардың лауреаттары Раушан Бескемпірова мен Гауһар Таспергенова орындайды.
astanaopera.kz
