Жаңалықтарды Telegram арнамыздан оқыңыз!Елімізде астықтың резервтік қоры құрылатын болды. «Астық туралы» заңға толықтырулар енгізу туралы заң жобасын Мәжіліс мақұлдады. Төменгі палата спикері Нұрлан Нығматулиннің айтуынша, заң жобасы азық-түлік қауіпсіздігінің деңгейін арттыру үшін маңызды құжат. «Пандемияға байланысты сауда-экономикалық байланыстар азайды. Бұл жағдай азық-түлік проблемасына да әсер етеді. Ал, астық мәселесі – ол бірінші кезектегі әлеуметтік сұрақ», - дейді Мәжіліс төрағасы. Қорда кем дегенде 500 мың тонна астық сақталады.
Рүстем Құрманов, ҚР Ауыл шаруашылығы вице-министрі:-Оның есебі халықаралық ұйымның ұсынысына негізделіп, есептелген. Бұл елдің азық-түлік қауіпсіздігін қамтамасыз етуге арналған 2 айлық минималды астықтың қоры.
Қор ішкі нарықты қамтуға және бағаны тұрақтандыруға жеткілікті, - дейді министрлік өкілі. Резерв төтенше жағдай енгізілген кезде халықты азық-түлікке қажетті астықпен қамтамасыз етуге жетеді. Айта кетерлігі, биыл 21 млн тоннадай астық жиналды. 7,5 млн тоннадай бидай мен ұн экспортқа шығарылады. Сонымен қатар жаңа заңда «Азық-түлік келісімшарт корпорациясы» ұлттық компаниясының» мәртебесі мен рөлі нақтыланған.
