Жаңалықтарды Telegram арнамыздан оқыңыз!Ұлттық холдингтер мен компанияларда сатып алудың жаңа тәртібі енгізіледі. Бүгін Мәжіліс отырысында «Квазимемлекеттік сектордың жекелеген субъектілерінің сатып алуы туралы» заң жобасы талқыланды. Құжат бірінші оқылымда мақұлданды.
«ҚазАгро» холдингі 3 жыл қатарынан мемлекеттік сатып алу процестерінің 98 пайызын бір көзден алу тәсілі арқылы жүргізген. «Қазақ туризм» ұлттық компаниясы сатып алулардың түгелін бір көзден алған. Демек, бәсекелестік аз. Ал сатып алулар бойынша жал сайын айналымға 3,5 трлн теңге түседі. Қыруар қаржының мақсатты жұмсалуына күмән болмауы керек. Депутаттар осы мәселені реттеуді талап етті.
Азат Перуашев, ҚР Парламенті Мәжілісінің депутаты:Ұлттық компанияларда бюджет жүйесі ашық болса «СҚ-фармациядағы» ондаған миллион теңге сыйақы төлеу», «пандемия кезінде дәрілердің жетіспеуінен адамдардың қаза болуы» сияқты жағдайлардың алдын алуға болушы еді. Тағы бір мысал, мемлекеттік кәсіпорындар менеджерлеріне фитнес және СПА-орталықтары үшін салық төлеушілердің қалтасынан 40 миллион теңге бөледі. Бұл тек жария болған деректер.
Сонымен қатар, заң жобасында тауарды 30 күннің ішінде жеткізу міндеттелген де, ал тапсырыс берушінің төлеу мерзімі белгіленбей кеткен. Демек, екі жақтың арасында теңсіздік бар.
Альберт Рау, ҚР Парламенті Мәжілісінің депутаты:Бұл норманы бекітуді талап етеміз. 30 күннен аспайтын уақытта төлем жүргізілуі тиіс.
Ерұлан Жамаубаев, ҚР Қаржы министрі:Біз, расымен, мерзімін көрсетпедік. Себебі, өзара келісімге қатысты шешілуі тиіс деп ойладық. Бірақ, осыған қатысты дау көп. Жеткізушінің құқығын шектемеу үшін енді нақты уақытын заңда көрсетеміз.
Квазимемлекеттік секторлардағы сатып алулар да біркелкі емес. Түрлі нормативтік құқықтық актілермен реттеледі. Яғни, бірізділік жоқ. Мәселен, «Самұрық-Қазына» қоры директорлар кеңесі бекіткен қағидаларға сүйенеді. Ал «Бәйтерек», «ҚазАгро», «Зерде» сияқты компаниялар «Мемлекеттік мүлік туралы» заңға және сатып алу ережелеріне иек артады. Енді мұндайға жол берілмейді. 250-ден аса ұлттық компания мен олардың еншілес ұйымдарының бәрі ортақ талапқа бағынуы тиіс. Қызметтер «Мемлекеттік сатып алу туралы» заңның аясында жүргізу ұсынылып отыр.
Асима Нұрбайқызы
