Жаңалықтарды Telegram арнамыздан оқыңыз!Ресей Украина астығын Қара теңіз арқылы экспорттауға мүмкіндік беретін келісімге қайта қосылды. Елдің қорғаныс министрлігінің мәлімдеуінше, Украина астық тасымалдау дәлізінде ұрыс қимылдарын жүргізбеуге жазбаша кепіл берген. Ведомствоның дерегінше, келісімді қайта жаңғырту БҰҰ мен Түркияның арағайындығымен мүмкін болды. Бұған дейін Украина астығын өзге елдерге жеткізетін гуманитарлық дәліз жұмысы бүгіннен бастап тоқтайтыны хабарланған еді. Мәскеу өткен сенбіде аталған құжаттан белгісіз мерзімге біржақты шығатынын мәлімдеді. Бұған Қырымдағы Қара теңіз флотының кемелеріне жасалған шабуыл түрткі болған. Ресей бұл оқиға үшін Украинаны айыптады.
Арай Төлегенқызы
