Жаңалықтарды Telegram арнамыздан оқыңыз!
Батыс Қазақстанда 12 ауылдың тұрғындары ауыз суды үш еседей қымбат бағамен сатып алуға мәжбүр. Себебі жергілікті әкімдіктер субсидия алуға құжаттарды уақытылы тапсырмаған. Соның кесірінен 17 мыңдай тұрғын судың текше метріне басқалар секілді 90 емес, 260 теңгеден төлеп отыр.
Сыбайлас жемқорлыққа қарсы қызмет «Батыс су арнасы» коммуналдық мекемесінде 6,5 млн теңгенің қосалқы бөлшектері жетіспейтінін анықтаған. Ал 43 млн теңгеге сатып алынған су сорғысы пайдаланылмай, қоймада тұр. Мекеменің жаңа басшысы қандай бөлшектер жоқ екенін анықтап, сотқа шағымданған.
Ерқанат Ерланұлы, облыстық Сыбайлас жемқорлыққа қарсы іс-қимыл департаменті басқармасының бас маманы:
Ауыл тұрғындары ауыз суға жоғары баға төлемес үшін аудан әкімдіктері мен тұрғын үй, коммуналдық шаруашылығы басқармасы құжаттарға мониторинг жасауы керек. Ал «Батыс су арнасындағы» қосалқы бөлшектердің жетіспеуіне байланысты қызметтік тексеріс жүргізу қажет. Қымбат құрылғы алу, қоймада тиісті тауарлардың жетіспеуі - сыбайластық қатердің көрінісі. Бұл бюджет қаржысының тиімсіз жұмсалуына әкеп соғады.
