Жаңалықтарды Telegram арнамыздан оқыңыз!Алматы облысына қарасты Панфилов аулындағы көшелердің біріне, Ұлттық қауіпсіздік комитиетінің Шекара ведомствосын басқарған, өмірінің 30 жылға жуығын әскери салаға арнаған – Тұрғанбек Стамбековтің есімі берілді. Сондай-ақ елдімекенде аллея ашылды. Аллеяға шырша ағаштары отырғызылып, мемориалдық тақта орнатылды. Тұрғанбек Стамбеков 2012 жылы 25 желтоқсанда 27 шекарашымен бірге «Астана-Шымкент» бағытында ұшқан әскери ұшақта апатқа ұшырап, қаза болған еді. Көзінің тірісінде мінсіз қызметі үшін I және II дәрежелі «Айбын» ордендерімен мараптталып, «Құрметті шекарашы» атағына ие болған. Марқұмның туған-туыстары қаза болған соң да жауынгерге осындай құрмет көрсетіліп жатқанына ризашылығын білдірді.
Мәриям Стамбекова, Тұрғанбек Стамбековтің әпкесі:
Толқып тұрмын. Өйткені өлгеніміз қайтып келгендей сезімдеміз. Жоғымыз қайта жаңғырғандай болып отыр. Сол Тұрғанбегіміздің өзі жоқ болса да аты аталып жүргеніне қуаныштымыз.
Тоқтасын Бұзыбаев, ҰҚК шекара қызметінің генерал-майоры:
Полковник Стамбеков әскери салада өз ізін қалдырды. Жас сарбаздар оның еңбек жолына қарап бой түзейді. Шекара ведомствосын қысқа уақыт басқарса да, адал, нәтижелі жұмысымен көзге түсе білді.
Нұрсұлтан Тілектес
