Жаңалықтарды Telegram арнамыздан оқыңыз!Ресейдің Орынборынан шыққан нөпір су Батыс Қазақстан мен Атырау облыстарына сәуірдің 20-сы, яғни ертең жетеді деген болжам бар. Соңғы мәліметке сай, Орал қаласындағы Жайық өзенінің деңгейі 8 метрге жеткен. Қауіпті деңгей 8,5 метр болып саналады. Нөпір су алдымен Орынборға шекаралас жатқан Бәйтерек ауданындағы Январцево ауылына бірінші болып жетеді. Елді мекендегі Жайықтың деңгейі күн сайын 28 см-ге көтеріліп жатыр. Солтүстік Қазақстан облысында топан судан төнген қауіп Сергеев су қоймасындағы жағдаймен топшыланатыны белгілі. Облыстық Төтенше жағдайлар департаментінің мәліметі бойынша, мұнда ернеуден асқан судың биіктігі – 2 м 93 см. Ал бірер сағат бұрын «Қазгидромет» мамандары Ақмола облысындағы Нұра өзенінің су деңгейі шекті мөлшерден 5 см-ге асқанын мәлім етті. Сондай-ақ 4 сағатта 6 см-ге артқанын анықтаған.
Қаракөз Тұрмағамбет
