Жаңалықтарды Telegram арнамыздан оқыңыз!Германиядағы доп додасының 1/8 финал ойындары аяқталды. Кеше ширек финалға соңғы жолдамаларды Нидерланды мен Румыния және Түркия мен Аустрия сарапқа салды. Кәрі құрлықтың үздік сегіз командасының қатарына кімдер енді?
Шерхан Жамбылұлы, Тілші:
Ширек финалға соңғы жолдамалар сарапқа салынбақ. Біз бұл жолы матчқа румындық жанкүйерлермен бара жатырмыз. Ойын алдындағы көңіл-күй тамаша.
Румыния құрамасы трансферлік баға бойынша Еурокубоктағы ең арзан команданың бірі. Дегенмен, бұл плей офф-қа шығуға кедергі болмады. Алайда ойын барысында азулы Нидерланды бірден допты бақылауға алды. 20 минутта шабуылшы Коди Гакпо есепті ашты.
Ал ойын соңына қарай Нидерланды футболшылары екі гол соғып, есепті 3:0-ге жеткізді.
Шерхан Жамбылұлы, Тілші:
Осылайша румындардың ертегісі аяқталды. Олар қанша тырысқанымен тәжірибелі Нидерланды құрамасынан айласын асыра алмады. Рональд Куман шәкіртттері осылай жанкүйерлерін қуантып жатыр.
Аман Тасыған, Жанкүйер:
Бұл жақта барлығының көңіл-күйі жоғары.
Ал, келесі кездесуде түркиялықтар Аустриямен жолдаманы сарапқа салды. Ә дегеннен қорғаушы Мерих Демирель анадолы елін алға шығарды.
Екінші таймда Түркия есепті еселеді. Аустрия тек бір голмен жауап қайтара алды. Осылайша Түркия 2008-жылдан бері алғаш рет еуропа чемпионатының ширек финалына өтіп отыр. Ол бұл айналымда Нидерланды командасымен кездеседі.
Шерхан Жамбылұлы
