Жаңалықтарды Telegram арнамыздан оқыңыз!Өткен тәулікте Газа секторы мен Ливанда Израильдің шабуылдарынан ондаған адам қаза тапты. 400 күн бұрын басталған соғыстың аяқталар түрі жоқ. Тель-Авивте оны тоқтатуды талап еткен шеру өтті. Оған талай адам қатысқан.
Израиль тұрғындары шеруге шығып, Газадағы атысты тоқтатып, кепілдегілерді босатуды талап етті. Айта кетсек, «Хамас» былтыр қазанның 7-де Израильге шабуыл жасап, 1200-дей адамды мерт қылып, 250-ден астамын Газаға алып кетті. Содан бері 400 күн өтті.
Шей Дикман, шеруге қатысушы:
Кепілдегілердің тұтқында отырғанына 400 күн болды. Әйелдер, ер адамдар, 86 жастағы ата, 1 жастағы бала бар. Олар осы күнге дейін Хамас-тың жер асты туннелінде отыр. Тағы бір қаһарлы қысты сонда өткізуге мәжбүр. Оларды аман-есен қайтарудың бір амалы - атысты тоқтату туралы келісімге келу. Соғыс аяқталып, кепілдегілер үйіне тез оралса екен.
Израиль болса, Газа секторындағы шабуылын жалғастырып жатыр. Соңғы мәліметке, осы 400 күнде 43 600-ден астам палестиналық қаза тапқан. Сол құрбандардың 30-ы өткен тәулікте Газаның солтүстігінде екі үйге ракета тигенде опат болған.
Абдалла Аллуш, газа тұрғыны:
Маған Алланың құдіреті жеткілікті. Жаратушы оларға жазасын береді. Бұл нағыз қырғын - отыз шәһид, барлығы бір жерге таң намазын оқу үшін жиналғанда жан тәсілім етті.
Израиль-«Хамас» қашан тоқтары белгісіз. Қатар үкіметі болса, тараптар атысты доғаруға шын ниет танытқанда ғана келіссөздердің жалғасатынын мәлімдеп отыр.
Ал Ливанның Алмат қаласында Израильдің шабуылынан 23 адам өлді. Олардың жетеуі – балалар. Израиль бұл мемлекетте «Хезболла» жасақтарымен шайқасып жатыр. Хезболла «Хамасты» жақтап, былтырдан бері еврей мемлекетіне мыңдаған ракета жаудырған.
Арыстан Рысбек
