Жаңалықтарды Telegram арнамыздан оқыңыз!Белгілі жазушы, драматург Дулат Исабековтың «Аққу-Жібек» пьесасы Эдинбург халықаралық фестиваліне қатысатын болды. Айта кетейік, өткен аптада Лондонда ағылшын тілінде премьерасы өтіп, Брайдуелл театрының тұрақты репертуарына енген болатын. Енді режиссер «Аққу-Жібек» пьесасын халықаралық фестивальдерге қатыстырып, әлемге паш етуді мақсат етіп отыр.
Жалпы, кез келген жазушы үшін оқырмандардың көп болуы – бақыт, ал драматург үшін пьесасының әлемге тарауы – үлкен бақ. Міне, Англияның театр сахнасында драматург Дулат Исабековтың «Аққу-Жібегі» ағылшын көрерменіне жол тартты. Махаббат, пәк-сезім, мейірімділік ұлтқа, дінге бағынбайтын ортақ құндылықтар. Сондықтан да бұл драматургиялық туынды ағылшын режиссеріне бірден ұнаған.
«Аққу-Жібек» пьесасы «Қыз Жібек пен Төлеген» жырына негізделген. Қойылым атасы немересіне «Аққу көлі» жайындағы ертегіні айтудан басталады. Зұлымдық пен мейірім, қызғаныш пен адал махаббат, пәк сезім кішкентай көрермендерге оңай әрі қарапайым тілмен жеткізілген.
Алексия Манковская, қоюшы-режиссер:
- Шынайы сезім тақырыптары қашан да көрерменнің жүрегінен орын табады. Ал, Дулат Исабековтың «Аққу-Жібегі» аңыздан құралған, соңында зұлымдық иесі – Бекежанның қарғаға, Қыз Жібек пен Төлегеннің аққуға айналып, махаббат әлеміне ұшып кетуі бала қиялына жол ашады. Сондықтан да мен осы туындыға қатты қызықтым.
Қойылымда басты рөлді сомдаған корей қызы - Рани Йю.Өз елінде тек киноға түсіп жүрген актриса Жібектің рөлін сомдау арқылы алғаш рет театрда бағын сынап көрді.
Рани Йю, Театр актрисасы:
- Мені кастингтен таңдап алған себебі түрім қазақ қызына ұқсас болды, пьеса қазақ аңызына негізделгендіктен қойылым ұлттық менталитетке сай болуына мән берілді. Алғаш сценарийді оқып шыққанда Жібектің өлетініне ішім ашыды, бірақ соңында оның аққуға айналып, Төлегенді өз әлеміне шақыруы мені қатты таңқалдырды. Қойылымның осы тұсы өте ұтымды шыққан.
«Аққу-Жібекті» ағылшындармен қатар, Лондонның лордтар палатасынан және Германия, Түркия дипломаттары да қызығып көрді.
Абдурахман Билгик, Түркияның Ұлыбританиядағы елшісі:
- Біз үшін Лондон төрінде қазақ пьесасын тамашалау - үлкен мақтаныш. Өйткені, мұнда түркі халқына тән мінез сипатталады, мәдениетіміз, болмысымыз ұқсас. Оның үстіне Дулат Исабековтың басқа да қойылымдарын Түркиядан көргенбіз, енді Лондон сахнасында. Өте қуаныштымыз.
Пьеса авторы Дулат Исабековтың өзі қойылымға оң баға берді. Эдинбург халықаралық фестиваліне баратын шығармашылық ұжымға сәттілік тілеп, ағылшын тілінде жарық көрген туындылар жинағын табыс етті.
Әйгерім АҒЫЛТАЕВА
