Жаңалықтарды Telegram арнамыздан оқыңыз!Биыл өңірлерді нығайтуға 7,7 трлн теңге қарастырылған. Бұл республикалық бюджеттің 30 пайызы. Қомақты қаражаттың мақсатты жұмсалуын мәслихат депуттары қадағалап, бақылап отыруы керек. Сенат төрағасы халық қалаулыларына осындай міндет жүктеді. Сенаттың мәслихат төрағаларымен өткізген кеңейтілген кеңестен Самал Қабышева толығырақ.
Бұл жандардың барлығы - әр өңірден келген облыстық және аудандық мәслихаттың төрағалары. Яғни, басшылары. Құр қол келмепті. Өңірлеріндегі өзекті мәселелерін жоғары жаққа жеткізіп жатыр. Мәселен, Құрық портымен танымал Маңғыстау облысындағы Қарақия ауданында жұмыссыздық мәселесі өзекті екен.
Жаңғабыл Қалаубай, Маңғыстау облысы Қарақия аудандық мәслихатының төрағасы:
Жұмыссыздық мәселесі. Қазір біздің ауданда 2,5 мың адам жұмыссыз ретінде тіркеуде тұр. Бұл 36 мың халқы бар ауыл үшін көп. Сондықтан кеше де ұсынысымды жасадым.
Гүлнәр Тойлыбаева, Жетісу облыстық мәслихатының төрағасы:
Біздің Жетісу облысында 57 мектеп реновациялауға жатады. Яғни, реконструкция жасау, жөндеу жұмыстарын жүргізуге жатады. Соның ішінде 7 мектепке күрделі жөндеу жүргізіледі. Қалған 50 мектепке 89 млрд-тай ақша керек.
Мейірхан Оспанбаев, Абай облысы Жарма аудандық мәслихатының төрағасы:
Сенат депутаттарымен, Мәжіліс депутаттарымен байланыс өз алдында, министрліктерге өзіміздің мәселелерімізді, сауалдарымызды қою арқылы біржақты шешім алып отырмыз.
Сенаттың мәслихат депутаттарымен өткізіп жатқан осы кеңейтілген кеңестің де көздегені осы. Жергілікті жерлердегі мәселелердің шешілуіне ықпал ету.
Мәулен Әшімбаев, ҚР Парламенті Сенатының төрағасы:
Бұл өзгерістер күшті Президент, ықпалды Парламент, есеп беретін Үкімет атты жаңа формуласына сәйкес жүзеге асырылуда. Президентіміз Қасым-Жомарт Тоқаев осы үш қағиданың тағы бір белгісі жауапты жергілікті басқару екенін айтқан болатын. Сондықтан аталған қағидат аясында мәслихаттарға маңызды міндет жүктелетіні сөзсіз.
Биыл өңірлерді нығайтуға 7,7 тлрн теңге қарастырылған. Бұл республикалық бюджеттің 30 пайызы. Сондай-ақ ауылдың кірісі де үш есеге артады. Осы мақсатта бірнеше төлем түрі ауыл бюджетінің пайдасына аударылады. Бұл туралы кеңейтілген кеңесте Премьер-министр орынбасары Ермек Көшербаев мәлім етті.
Самал Қабышева, тілші:
Елімізде 3300-ден астам мәслихат депутаты бар. Олар өз өңірінің бюджетін бекітіп қана қоймай, олардың орындалуын да жіті қадағалауы қажет. Сенат төрағасы Мәулен Әшімбаев кеңейтілген кеңесте осылай деді. Қазір мәслихат депутаттарының құзіреті, оларға берілген мүмкіндіктер артуда. Халық қалаулыларына еліміздің өркендеуі мен дамуы жолында аянбай жұмыс істеу қажет.
Самал Қабышева
