Жаңалықтарды Telegram арнамыздан оқыңыз!Щучье қаласында дене шынықтыру және спорт саласындағы келісім қатысушылары кеңесінің отырысы өтіп жатыр. Бұл келісімге Тәуелсіз Мемлекеттер Достастығы елдері мүше. Жиынның барысы туралы Ермек Елберген баяндайды.
Ермек Елберген, тілші:
- Кеңес отырысында алдымен қатысушы мемлекет өкілдері өздерінде атқарылып жатқан жұмыстар жайлы баяндады. Біздің мамандардың мәліметінше, елімізде бұқаралық спортпен шұғылданатындар үлесі 30 пайызға жеткен. Алматы облысында олимпиадалық даярлау орталығы, Нұр-Сұлтан қаласында олимпиадалық база салынып жатыр. Сондай-ақ, республика бойынша 100 спорт кешенін салу жұмыстары жүргізілуде. Отырыста допингке қарсы күрес те талқыланды.
Елсияр Қанағатов, Ұлттық олимпиада комитеті спорт дирекциясының директоры:
- Қазақстанда министрлік өз тарапынан Парламентке осы заң жобасын кіргізіп жатыр. Жұмыс тобында Ұлттық олимпиада комитетінің өкілдері де бар. Сондықтан допингпен күресу керек. Жан-жақты бірігіп күресу керек.
Ермек Елберген, тілші:
- Жиынның басты мақсаты — сыртқы байланысты нығайту, өзара тәжірибе алмасу. Қазақстандық тарап әріптестеріне спорт саласында сандық жүйені кеңінен енгізуді ұсынды. Сондай-ақ, осы жолы дене шынықтыру және спорт саласындағы келісім қатысушыларының 2021-2030 жылдарға арналған әріптестік стратегиясының жобасы қабылданды. Құжат бойынша ТМД елдері оқу-жаттығу жиындарын бірлесіп өткізуді көздейді. Алдағы уақытта федерация деңгейінде тағы келісімдер жүргізілмек.
