Жаңалықтарды Telegram арнамыздан оқыңыз!Семейлік Марат Алиасқаров - ядролық сынақтар салдарынан көру қабілетінен айырылған жан. Осылай бола тұра, бүгінде қоғамның тең мүшесіндей өмірге араласып, мүгедектердің мәселесін шешуге атсалысып жүр.
Жақында жалғыз өзі зағип жандардың жағдайын оңалтуға қатысты Жапонияда болған әлемдік жиынға барып-қайтты.
Марат Алиасқаров Семей сынақ полигонының іргесіндегі Абай жерінде дүниеге келген. Ядролық радиацияның кесірінен, көзінің нұры ерте тайды. Соған қарамастан өмірдің қиындығына мойымаған жан қатарластарынан қалған жоқ. Жоғары білім алды. Бірнеше тілді еркін меңгерген. Өнерге жаны жақын жігіт талай беделді сайыстарда топ жарды.
Бұл - Мараттың бірер жыл бұрын беделді тележобаға қатысқан сәті. Бас жүлдені жеңіп, әртіс атанып кетпесе де, он екі мүшесі сау әншілермен сайысқа түсіп, өзінің ерік-жігерін көрсетті. Сол арқылы сағы сынып жүрген талай мүгедек жанның жүрегіне үміт отын жақты.
Бақытжамал Райымханова, зағип және көздері нашар көретіндерге арналған арнайы кітапхана директоры:
Қаншама байқауларға қатысып жатыр, үйде отырып қалған жоқ. Марат - үлгі алатын азаматтардың бірі деп айта аламыз.
Марат - қоғамдық жұмыстардың белсендісі. «Шамшырақ» атты зағип жандардың көркемөнерпаздар клубын басқарады. Өмірлік мақсаты - мүмкіндігі шектеулі азаматтардың мәселесін шешуге үлес қосу. Көздегені Елбасының биылғы жолдауынан кейін шешім табатындығына үмітті.
Марат Алиасқаров, І топтағы мүгедек:
Мемлекетіміз мүгедектерге бетін енді бұрып келе жатыр деп ойлаймын. Ол өте дұрыс бастама деп есептеймін. Оларды еңбекпен қамтамасыз етуге тырысу керек. Дайын бағдарламаларым да бар.
Марат ол бағдарламаларды жақында Жапонияның Окинава қаласында болған жиыннан алып келген. Әлемнің әр түкпірінен барған белсенділердің арасында қазақ елінен ол жалғыз өкіл болды.
Көзі көрмесе де, ешкімнің көмегіне жүгінбеген. Күншығыс елінде барып мүмкіндігі шектеулі жандарға жасалған жағдайлармен танысып қайтқан.
Марат Алиасқаров, І топтағы мүгедек:
Жапонияда бұл саясат осыдан 20-25 жыл бұрын басталған екен. Сондықтан, бүгінде жемісін көріп отыр.
Қазір ағылшын тілін жетік меңгерген жігіт жапондардың мүгедек жандарға арналған ең тиімді деген бағдарламаларын, қазақ тіліне аударып жатыр. Оны билік басында отырғандарға ұсынбақ. Қолдау тапса, зағип жандардың жағдайын жақсартуға қосқан үлесім болар еді, деп санайды.
Ержан ЖАҚЫП
