Жаңалықтарды Telegram арнамыздан оқыңыз!Бұдан былай ғимараттардың маңдайшалары мен көшедегі жарнамалардағы жазуларға талап күшеймек. Қолданыстағы Заңда қазақ тілінде кеткен қателерді түзету үшін бір жыл мерзім берілетін. Енді бұл уақыт бір жыл емес, бір айға қысқарады.
Халық қалаулылары Әкімшілік құқық бұзу туралы кодекске осындай өзгеріс енгізуді жоспарлап отыр.
Қазақ тіліне құрмет жетіспейді. Астанадағы ғимараттардың маңдайшасындағы жазуларға қарап, бұлай демеске амал жоқ. Мемлекеттік тілде жазылған мәтіндердердегі қатеден көз сүрінеді. Себебі, жеке кәсіпкер дүкені мен дүңгіршегіне қай тілде атау берем десе де өз еркі.
Серік Сәлемов, ҚР Мәдениет министрлігі Тіл комитетінің нормативтік-лингвистикалық жұмыстар басқармасының басшысы:
Атауын қалай жазса да, кәсіпкерлердің өз еркі. Біз оған мына атауды жазба, орысша, шетелше жазба деп, шектеу қоя алмаймыз.
Бұған дейін Заңды белден басқандарға құзырлы органдар жаза қолданбақ түгілі, айыппұл да сала алмай келді. Биылдан бастап, жаңа заң бойынша мемлекеттік тілге мұрынын шүйіре қарағандарға 20-мыңнан 200 мың теңгеге дейін айыппұл тағайындалды.
Бірақ, бизнес нысандарын тексеруге болмайды деген мораторий тіл мамандарын тағы жіпсіз байлап отыр. Есесіне, құзырлы органның құрығынан құтылғандарды жазалауға қарапайым тұрғындардың құқы бар.
Оразгүл Асанғазы, ҚР Парламенті Мәжілісінің депутаты:
Қазақстандықтардың намысының оянатын кезі келді. Мемлекеттік тіл туралы Заңның бұзылғанын көрсе, қоңырау соқсын, арыздансын.
Тіл күрмеліп, көз ұялатын жарнамадағы жазулар Павлодар көшелерінде қаптап тұр. Шала сауаттылар жарнама мәтіндерін орыс тілінен тікелей аударып, қазақ тіліне қысастық жасап отыр.
Жергілікті тіл басқармасы болса, 200-ден артық заңды тұлғаға ескерту берумен шектелген. Сонда да нәтиже жоқ. Шымбайға бататын тағы бір жайт - Керекуде қазақша көше атауы ілуде біреу. Есесіне, Ленин атындағы көше бар.
Қала тұрғыны:
Өз тілімізге құрмет қажет. Құрметпен қараса, қателік болмас еді.
Қала тұрғыны:
Айтар сөз көп, естір құлақ жоқ.
Қала тұрғыны:
Не жазылғанын түсіну қиын.
Нұргүл Сағитқызы, тілші:
Астананың оң жағалауындағы Тілендиев көшесі. Тақтайшаға жазылған сөздің әріптері түсіп қалғандықтан, мән-мағынасы жойылып, ақыры сөздің қадірі қашып тұр. Бұл - етек-жеңімізді жиғанымызға 20 жылдан асса да, өз тұғырынан көріне алмай келе жатқан қазақ тілінің бүгінгі ахуалын, тілге деген енжарлық пен бойкүйездікті көрсетсе керек. Есілдің сол жағалауындағы сауда орындары мен дәмханалардың, қонақүйлердің 70 пайызының атаулары ағылшын тілінде. Осы ретте, қайран Қадыр ағадай, арың болған, ұятың болған ана тіліңді өзекке теппей, әуелі өзің қадірле, дегің-ақ келеді.
Нұргүл САҒИТҚЫЗЫ
