Жаңалықтарды Telegram арнамыздан оқыңыз!Өйткені, көбіне-көп таңдау шетелдік анимацияға түседі. Ал, балалар құбыжық кейіпкерлерге әуес. Ал, мейрамды кәсіпке айналдырғандар не дейді? Тілшіміз Әсел Басшыбек осы мәселені зерттеп көрді.
Қания Менғалиқызының 5 немересі бар. Оның екеуін өзі тәрбиелеп отыр. Шаңырағында атап өтетін барлық мейрам мен тойды жүргізу үшін аниматорларға хабарласады екен.
Қания Мейірманова, Астана қаласының тұрғыны:
- Көбіне келетіндері орыстардың «фиксики», «тоботтар», роботтар. Бір қазақша, қазақ костюмымен келгенін көрген жоқпын. Өйткені, ондайлар жоқ.
Серікжан Олжаев, аниматор:
- Қазақ костюмдеріне сұраныс жоқ. Сондықтан біз алмаймыз. Балалардың мейрамдарында негізінен «человек паук» деген бар, өте сұранысқа ие. Басқа елдің батыры. Бірақ, балалар оны өте жақсы көреді. Өйткені, батырлықты көрсетеді, қорықпайды, адамдарға көмектеседі. «Капитан Аменрика» деген бар. Өте сұраныста.
Бұл Астана қаласының әкімдігіне қарасты қуыршақ театры. Олардың да таңдауы шетел анимациясына түсетінін байқадық. Бастауыш сыныптар Жаңа жылға арналған ертеңгілікте билеп, ән салған отандық туынды кейіпкерлерінің орнына көрші елдікін тамашалады.
Жаңагүл Шәмші, актриса:
- Сұраныс бар, бірақ алып шығатын қазақи мультфильм жоқ. Келесі жылы қазақи мультик шығып жатса, балаларға өте қызықты болса, міндетті түрде сол кейіпкер шығады. Мультфильмнен «фиксики» бар. Балалар оларды өте жақсы көреді. «Джек Воробей» деген кинодан алынған кейіпкерлер де бар. Оны да жылы қабылдайды.
Анимациялық кино режиссері Жәнібек Нұрбекұлы «қазақша анимация жоқ емес, бар. Бірақ, теңізге тамған тамшы сияқты көрінбейді», - дейді.
Жәнібек Нұрбекұлы, анимациялық кино режиссері:
- Дамымай жатқанының басты себебі, бизнеске айналмайды. Анимация өте тамаша бизнес саласы. Комикс кітаптарын шығару керек. Ойыншықтарын жасау керек. Мультфильм жасап, кинотеарлардан көрсетуге болады. Содан сұраныс пайда болады. Қазақстанда 1 жылға бөлетін қаржы 1 млн. долларға жетпейді. Біздегі ең кемшілік тұстар осы.
Қанипа апай сияқты аға-буынның ұрпақтың болашағына алаңдайтынына негіз бар. Бүгінде балаларға мерекелік көңіл-күй сыйлап, осы саланы кәсіп етіп жүргендер «мәселе сұраныста», дейді. Яғни, ұлттық болмысымызға сай кейіпкерлердің пайда болуына барлығымыз бірдей атсалысуымыз керек.
Амал жоқ. Қайта айналып шетел мультфильм кейіпкерлеріне тапсырыс береміз. Мәселен, той ұйымдастыратын орталықта 90 түрлі костюм бар, соның 2-уі ғана қазақ ертегілерінен алынған.
Әсел БАСШЫБЕК
