Шексіз алғыс, риясыз көңіл, шын пейіл. Бүгін – Алғыс айту күні. Сұрқия саясаттың кесірінен бір түнде отбасы ойрандалған көп ұлысты кеңпейіл қазақ сандалтпады. Өзіне жетпей жатса да, өзегінен теппеді. Бауырына басты, барымен бөлісті. Ұлан-ғайыр даладан ондаған ұлыс өкілдері отауын тігіп, Отанын тапты.
Қазір бір-біріне деген сыйластық пен сенім мықты. Сондықтан Президент 2016 жылы 1 наурызды Алғыс айту күні етіп белгіледі. Содан бері еліміздегі көп ұлыс бір-біріне ілтипат білдіріп, ынтымақты нығайта түсті. Көтеріңкі көңіл-күй сыйлап, кішіпейіл бола білді. Бүгінде толайым тағдыры қазақпен тығыз байланысқан өзге этнос өкілдері үшін Қазақстан туған жерден де артық. Оған – қоғамдық келісімнің, ынтымақ пен бірлік, татулық пен тұрақтылықтың ықпал еткені анық. Мемлекет басшысы айтқандай, барын бағалап, сый-қадірін білген елдің келешегі кемел болмақ.
Анна Жанахметова, мұғалім:
- Қазақ деген ұлы елге алғыс айтамын! Қазақ болмаса, бүгін біз болмас едік. Мен өзім неміс ұлты болсам да, жүрегім қазақ. Қазақ отбасының келінімін.
Армангүл ТОҚТАМҰРАТ
![](https://px.mediadata.kz/s.gif?mh_id=7916e9245b3c5232be2c21bfdafded87&mh_news=Бүгін – Алғыс айту күні&mh_tags=Qazaqstan&mh_page=https://qazaqstan.tv./news/64076/)