Жаңалықтарды Telegram арнамыздан оқыңыз!Шығыс Қазақстанда жалпы білім беретін пәндер бойынша республикалық олимпиаданың облыстық кезеңі өтті. Аймақ орталығы Өскеменде ұйымдастырылған білім сайысына аудандық және қалалық олимпиадаларда жеңіп шыққан 9-11 сынып оқушылары жиналған.
Қатысушылардың жалпы саны - 610. Олар 14 пән бойынша білімдерін сынады. Қазылар алқасының құрамына облыстағы жетекші жоғары оқу орындарының ғалымдары кірген.
Шараның негізгі мақсаты - балалардың шығармашылық зейінін дамыту, теориялық білімін тереңдету және тәжірибелік біліктілігін арттыру. Олимпиаданы облыстық білім басқармасы мен өңірлік ғылыми-практикалық «Дарын» орталығы өткізді.
Қазылар алқасы бүгін қорытынды шығарып, 72 оқушы жеңімпаз атанды. Енді олар жалпы білім беретін пәндер бойынша республикалық олимпиадаға қатысады.
Шыңғыс Айдынов, олимпиадаға қатысушы /Семей қаласы/:
Барлық ауданнан, барлық мектеп-лицейден тек қана үздіктердің үздіктері, былайша айтқанда, «сүт бетіндегі қаймақтары» ғана жиналған болатын. Осы үздіктердің ішінде топ жарып, ең жүйрік атанғаным - мен үшін үлкен қуаныш.
Гүлжан Елемесова, өңірлік ғылыми-практикалық «Дарын» орталығының лаборатория меңгерушісі:
Респубикалық кезеңге 72 адам қатысуға жолдама алды. Республикалық кезең Өскемен қаласында наурыз айында өткізіледі. Ең үздік олимпиадалық команда Өскемен және Семей қалалары болды. Осы қалалардағы қазақ-түрік лицейлері және аудандардың арасынан Күршім ауданы ең үздік деп танылды.
Берік КӨШЕРБАЕВ
