![Әлихан Бөкейханның шығармашылығына арналған республикалық конференция өтеді](https://cdn.qazaqstan.tv/old/articles/3/article_35290.jpg?w=928&h=522&format=jpg&resize=aspectfill&g=center)
Биыл - қазақтың көрнекті мемлекет қайраткері, ұлт көсемі, публицист, энциклопедист-ғалым Әлихан Бөкейханның 148 жылдығы. Осыған орай, 6 наурыз күні Л.Н.Гумилев атындағы Еуразия Ұлттық университетінде «Әлихан Бөкейхан. Марксизм қағидасынан ұлттық «Алаш» идеясына дейінгі эволюциялық жол» атты республикалық конференция өтеді.
Әлихан Бөкейхан - ғұлама ғалым, ормантанушы, экономист, мал шаруашылығын зерттеуді ғылыми жолға қоюшы, тарихшы, этнограф, әдебиеттанушы, аудармашы ретінде қазақ халқының саяси-әлеуметтік, мәдени-рухани өмірінде өшпестей із қалдырған ұлы тұлға.
Ол - қазақ тарихындағы тұңғыш саяси ұйым - ұлт-азаттық «Алаш» қозғалысының жетекшісі, Алашорда автономиялы үкіметінің төрағасы.
1906 жылы Омбыдан шыққан кадеттік «Голос степи», «Омич» және «Иртыш» газеттерінде, 1908 жылы Санкт-Петербургте жарық көрген меньшевиктік «Товарищ», кадеттік «Речь», «Слово» газеттерінде редакторлық қызмет атқарды.
1911-1914 жылдары «Қазақ» газетінің ашылуы мен оның жалпыұлттық деңгейге көтерілуіне зор үлес қосты.Ұлт зиялысының мерейтойына арналған шара барысында «Әлихан Бөкейхан. Шығармаларының 9 томдық жинағы - Собрание сочинений в 9 томах» жинағының тұсаукесері өтпек.
Конференция жұмысына тарихшы-ғалымдар, депутаттар, қоғам қайраткерлері мен студенттер қатысады.
Іс-шара «Бабалар қорымында» дамыл тапқан көрнекті мемлекет қайраткері Смағұл Сәдуақасұлы мен Кенесары хан сарбаздарының рухына зиярат етуден басталады.
Конференциядан кейін Әлихан Бөкейханның рухына арналып ас беріледі.
![](https://px.mediadata.kz/s.gif?mh_id=7916e9245b3c5232be2c21bfdafded87&mh_news=Әлихан Бөкейханның шығармашылығына арналған республикалық конференция өтеді&mh_tags=Qazaqstan&mh_page=https://qazaqstan.tv./news/84830/)