Жаңалықтарды Telegram арнамыздан оқыңыз!1 қараша күні Оңтүстік Қазақстан облысы, Түлкібас ауданында қазақтың біртуар азаматы Тұрар Рысқұловтың 120 жылдығына орай мерекелік іс-шара өтеді.
Шара Т.Рысқұлов ауылының «Жанкент» мөлтек ауданындағы саябақта Рысқұлов ескерткішіне гүл шоқтарын қою рәсімімен басталады.
Одан кейін мереке М.Х.Дулати атындағы аудандық Мәдениет сарайында қоғам қайраткеріне арналған ғылыми-тәжірибелік конференциямен жалғасады.
Ал, Кемербастау ауылдық округінде М.Жәрімбетов ауылында қазақтың көрнекті перзенті Т.Рысқұловтың бюстін орнатуға арналған ескерткіштің қазығын қағу және 120 түп емен ағашын егу рәсімі өтеді.
Іс-шара Жаскешу ауылдық округіндегі Тұрар Рысқұлов атындағы жалпы орта мектебінде оқушылардың концерттік бағдарламасымен жалғасын таппақ.
Айта кету керек, мерейтой барысында ұлттық ат спорты ойындары: бәйге (тай жарыс), аударыспақ, көкпар ойнатылады.
